Spisowaćeljo (Schriftsteller) charakterizuja jednace wosoby (handelnde Personen) w literarnych twórbach, zo bychu je čitarjej wonkownje předstajili (äußerlich vorstellen) a runje tak jich jednanje (Handeln), myslenje (Denken) a zadźerženje (Verhalten).
- Figury móža so direktnje abo indirektnje charakterizować.
- Pokiwy (Hinweise) za direktne charakterizowanje namakaš w tekstowych městnach, hdźež so powědar (Erzähler) abo druhe wosoby wo figurje wupraja (äußern). Wobkedźbuj pak při tym (beachte dabei), w kotrym poćahu (Verhältnis) figury k sebi steja (na př. maja so rady, hidźa so).
- Literarna figura (literarische Figur) móže so tež indirektnje charakterizować, na přikład přez wašnje (über die Art und Weise), kak wona rěči, mysli, začuwa (fühlt) abo jedna (handelt). Wuprajenja (Aussagen) a jednanja maš hódnoćić (bewerten): to rěka, zo dyrbiš wobstejnosće (Umstände) wobkedźbować, pod kotrymiž so jednanje wotměwa (abspielt).
Přikład:
tekst: Něchtó liči swoje pjenjezy.
- kontekst A: Scena jedna w domje bohačka (im Haus eines Reichen).
→ wotwodźena kajkosć: Figura je nahrabna (habgierig). - kontekst B: Scena jedna w domje chudeho (im Haus eines Armen).
→ wotwodźena kajkosć: Figura je zlutniwa (sparsam).
žórło: Domowina - Zwjazk Łužiskich Serbow z.t., Rěčny centrum WITAJ: Naša maćeršćina 8: wučbnica za 8. lětnik serbskich wyšich šulow a serbskeho gymnazija. Ludowe nakładnistwo Domowina. 1. nakład (2014).